ILOILO CITY- Nagalaum ang mga Local Government Units sa bilog nga Western Visayas nga dalayon na nga magabalik ang operasyon sang iban nga sektor sa tion nga makapagwa na sang bag-o nga pronouncement ang National Inter Agency Task Force tuhoy sa pagbag-o sang classification sang quarantine sa Hunyo 15.
Sa interview sang Bombo Radyo kay Iloilo City Mayor Jerry Treñas, iya ginpahayag nga natukod na ang Technical Working Group sa rehiyon agud tutukan ang
pag-asikaso sa pila ka mga sektor nga hatagan sang prayoridad umpisa sa masunod nga semana.
Suno kay Treñas, isa sa tutukan amo ang flights sang eroplano ilabi na ang repatriation sang mga Locally Stranded Individuals kag mga Overseas Filipino Workers.
Hatagan man sang prayoridad ang talunsay nga byahe padulong sa isla sang Negros kag ang pagbalik sang Boracay bilang nagapanguna nga tourist destination para sa mga pumuluyo sang Rehiyon 6.
Sentrohan man sang Technical Working Group ang pagbukas sang iban pa nga mga establishments nga wala gihapon nalakip sa mga ginapahanugutan nga makabalik sa operasyon kaangay sang lodging houses kag mangin ang pagpatigayon sang bulang.
Tinguhaan man nga matigayon ang pagpahanugot sa 75 tubtob 100 percent nga pagbalik sa operasyon sang bug-os nga sektor sang transportasyon.
Sa subong suno kay Treñas, ginahulat nalang sang mga Local Chief Executives ang mangin bag-o nga classification sa diin nagalaum man ang alkalde nga pahalugan ang quarantine classification sa rehiyon bangud nga wala na sang narecord nga local transmission sa Western Visayas.
