ILOILO – Indi mahimo nga pahanugutan ang face-to-face classes sa mga malayo nga lugar ilabi na sa nabukid nga bahin sang probinsya sang Iloilo.
Ini ang reaksyon ni Dr. Roel Bermejo, Schools Division Superintendent sang Department of Education – Iloilo, may kaangtanan sa hingyo sang mga ginikanan nga wala sang ikasarang sa pagtudlo sa ila kabataan nga nagpa-enroll sa modular learning.
Sa interview sang Bombo Radyo kay Bermejo, iya ginpahayag nga indi gid mahimo nga pahanugutan ang face-to-face classes bangud nga ginmandu mismo ni Presidente Rodrigo Duterte nga blended learning ang patigayunon subong nga school year.
Suno kay Bermejo, indi man mahinago nga ang iban nga mga ginikanan ang wala sang ikasarang nga magtudlo sa ila kabataan apang agud nga masolusyunan ang nasambit nga problema, may yara ang volunteer learning facilitators nga amo ang magabulig sa pagtudlo sa estudyante.
Ang volunteer learning facilitators nga gintumod sang tagsa ka school management amo ang mga professionals gikan sa nagkalain-lain nga patag nga mahimo magbulig sa pagtudlo sa tion nga indi makasarang ang ginikanan.
