ILOILO – Mas makinot ang home-based learning kun ipaanggid sa face to face classes.
Ini ang nangin pahayag sang isa ka iloy nga may yara sang isa ka anak sa Elementary kag 3 sa High School nga lunsay nagpa-enroll sa modular learning.
Sa interview sang Bombo Radyo sa iloy nga si Mely Jean Jover, iya ginpahayag nga ang mga ginikanan na lang amo ang nagakuha sang module santo sa designated place kag schedule nga ginhatag sang manunudlo.
Bangud nga home-based learning, ginpahayag ni Jover nga indi na kinahanglan pa nga hatagan sang allowance ang apat niya ka anak bangud nga siya na lang mismo ang nagakuha sang modules nga kinahanglanon.
Ginpahayag ni Jover nga bilang iloy, ginapahangop niya sa anak nga yara sa Elementary kun ano ang kaundan sang module kag kun paano sabtan ang ginhatag nga activity.
Apisar sang mga pagpanghangkat, ginpahayag sang natungdan nga mas nahatagan siya sang tion agud nga matutukan ang pagtuon sang iya mga kabataan.
