LEON, ILOILO – Modular ang learning modality sa banwa sang Leon, Iloilo.
Ini ang ginpahayag sa Bombo Radyo ni Mayor Ma. Lina Holipas may kaangtanan sa pagbukas sang klase sa mga pampubliko nga eskwelahan buwas nga adlaw.
Suno kay Holipas, mapin-ot kun online learning ang patigayunon ilabi na sa mga nabukid nga bahin sang banwa.
Sa pagkamatuod suno kay Holipas, 43 gikan sa 85 ka barangay sa Leon ang wala sang signal kag sa subong, ginatinguhaan sang Local Government Unit nga makapahamtang sang dugang sang cell site.
Sa subong suno kay Holipas, may duha na ka telecommunication companies nga nagpatigayon sang survey.
3 na lang ang nabilin nga COVID-19 cases sa Leon, Iloilo.
Sulod sang pito ka bulan, 23 ang na record nga COVID-19 cases apang ang 20 ang naka-recover na.
Suno kay Holipas, gindugangan man ang mga quarantine facilities bangud nga padayon ang pag-abot sang Returning Overseas Filipinos kag Locally Stranded Individuals.
Ginpahayag ni Holipas nga sa tagsa ka barangay, ginaduso nga pagabutangan sang quarantine facility agud nga maka-akomodar sang madamo nga ROFs kag LSIs.
