ILOILO – Plano sang Iloilo Provincial Government nga magpatigayon sang massive rabies vaccination sa mga ido umpisa sa Enero 2021.
Sa interview sang Bombo Radyo kay Dr. Darel Tabuada, Provincial Veterinarian, iya ginpahayag nga sa subong, naatrasar ang pagbakal sang rabies vaccine kag ang pagpatigayon sang dog vaccination bangud sa COVID-19 pandemic apang ang 10,000 vials sang bakuna ang ginalauman nga maga-abot kag mapanghatag sa tagsa ka Local Government Unit sa masunod nga bulan.
Suno kay Tabuada, nagalab-ot sa masobra sa 250,000 ang head count sang mga ido sa bug-os nga probinsya rason nga ginakulang ang bakuna nga gikan lamang sa Iloilo Provincial Government.
Ginpahayag ni Tabuada nga subong nga 2020, tatlo na ang napatay bangud sa rabies kag ini ang na record sa Carles, Tigbauan kag Dueñas.
Agud nga makabulig sa kampanya sang gobyerno nga mangin rabies free ang Pilipinas, importante suno sa natungdan nga mangin responsable ang mga pet owners paagi sa pagtatap sang maayo sa hinuptanan nga ido.
