ILOILO CITY – Ipaagi sa gihapon sa streaming ang pagpalayag sang misa apisar nga ginpaidalom na sa General Community Quarantine ang Iloilo.
Ini ang ginkumpirma ni Fr. Angelo Colada, Director sang Social Communications sang Archdiocese of Jaro, matapos ang pagsinapol kaupod ang mga katapo sang Simbahang Katolika kag mga tiglawas sang Iloilo City Government.
Sa interview sang Bombo Radyo kay Colada, iya ginpahayag nga magapadayon ang church activities kasubong sang misa apang indi sa gihapon pagpahanugutan nga makasulod sa simbahan ang mga deboto.
Suno kay Colada, mabati-an kag makita ang ginapatigayon nga misa paagi sa online streaming kag sa live coverage sang Bombo Radyo.
Ginpahayag ni Colada nga pahanugutan ang bunyag, kasal kag lubong apang limitahan lang ang magatambong kag ang magasulod sa simbahan.
Ang nasambit nga mga aktbidad ang ginaduso nga patigayunon sa tion sang weekdays bangud nga ang Sabado kag Dominggo ang italana sa pagpatigayon sang misa kag pagpangamuyo.
Pahanugutan man ang pagpatigayon sang confession ukon pagkumpisar apang may yara sang ipahamtang nga alcohol kag sanitizers kag pagabutangan man sang tela ang confessional bilang proteksyon sa pari kag sa nagakumpisar.
