ILOILO CITY – Nangin matalunsay ang ginapatigayon nga Oplan Hawan ukon clearing operations sa mga national road sa syudad sang Iloilo.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga sa sulod sang tatlo ka adlaw nga pagpatigayon sang Oplan Hawan, wala man sang may nagpamalabag sa clearing operations.
Suno kay Conlu, magapadayon ang Public Safety and Transportation Management Office sa pagpatigayon sang Oplan Hawan tubtub nga matapos ang 60-day implementation period nga ginhatag sang Department of Interior and Local Government.
Sa ika-apat nga adlaw sang Oplan Hawan, ginpahayag sang natungdan nga ang palibot sang Iloilo Terminal Market sa gihapon ang ila pagatutukan.
Kalabanan naman sa mga nakita nga obstruction sa palibot sang Iloilo Terminal Market amo ang mga royda sang salakyan, mga kahoy kag mga balaligyaan sang vendors nga nagalapaw na sa alagyan.
