ILOILO CITY – May yara sang madalum nga kahulugan ang pagpatigayon sang PAMUKAW antes ang Dinagyang Festival 2020.
Sa interview sang Bombo Radyo kay Phillipp Chua,chairman sang PAMUKAW event kag Kiosk Committee, iya ginpahayag nga ang PAMUKAW ang palatandaan sang pag-umpisa sang Dinagyang season.
Santo sa istorya sang mga katigulangan suno kay Chua, ang PAMUKAW ang isa ka aktibidad bilang pagsug-alaw sa kaadlawan ni Hesus.
Suno kay Chua, ang PAMUKAW ang ginapatigayon, pila ka adlaw antes mag-umpisa ang Simbang Gabi.
Ginpahayag sang natungdan nga ang PAMUKAW subong nga tuig ang pinasahi ipaanggid sa kinaandan sa diin dululungan nga maga-perform ang competing tribes sa tagsa ka public plaza sa syudad.
Nahibalu-an nga ang nasambit nga aktibidad ang patigayunon sa Disyembre 14, umpisa 8:00 sa gab-i.
Samtang, magalab-ot lamang sa 400 ka kiosko ang mahimo arkilahan sang mga negosyante para sa Dinagyang Festival 2020.
Suno kay Chua, mangin alalangay ang kadakuon sang mga kiosko kag may yara lamang sang pili nga lugar nga pahamtangan sini.
Ginpahayag sang natungdan nga indi kasubong sa mga nakaligad nga Dinagyang Festival nga magutok ang mga dalan apang sa subong, ang katunga sang dalan ang himuon nga alagyan bilang pagpanghanda sa emerhensya.
Sa Disyembre 15 suno kay Chua ang deadline sa pagbaton sang sponsorship sa pagkuha sang kiosko.
