MALTA – Libre ang ginapatigayon nga swab test para sa mga nakitaan sang sintomas sang Coronavirus Disease 2019 (COVID-19) sa Malta.
Suno kay Bombo International Correspondent Miluna Pablo, ginapaidalom sa swab test ang tanan nga mga pasyente nga nakitaan sang sintomas sang COVID-19 samtang bastante naman ang supply sang Personal Protective Equipment para sa mga medical personnel.
Ginpahayag ni Pablo nga bisan wala pa sang kumpirmasyon nga COVID-19 positive ang isa ka pasyente apang sila nga mga medical personnel ang kinahanglan gid nga magsuksok sang Personal Protective Equipment bilang proteksyon.
Ang mga senior citizen naman nga pasyente nga indi infected sang virus ang ginsaylo sa pribado nga Elderly Homes kun sa diin ang gobyerno mismo sang Malta ang nagabayad.
Ang nagapabilin lamang sa hospital amo ang mga pasyente nga nagakinahanglan gid sang medical attention kasubong sang operasyon apang may yara man sang lain nga isolation facility para sa COVID-19 patients.
Indi kasubong sa Pilipinas, indi mandatory ang pagsuksok sang facemask sa tion nga magguwa sa balay apang istrikto lang nga ginapatuman ang physical distancing kag ang pagsunod sa proper hygiene.
Tuman ka mahal ang multa sa tion nga madakpan nga ginalapas ang ginapatuman nga home quarantine kun sa diin sa kada adlaw, may yara sang monitoring nga ginapatigayon.
Bilang preventive measures, ginpasirado na ang bars kag pila ka commercial establishment apang nagapabilin sa gihapon nga bukas ang supermarkets kag grocery stores samtang temporaryo naman nga ginkansela ang pagpatigayon sang aktibidad sa tagsa ka Dominggo nga adlaw kadungan sang family day sa Malta.
Sa subong, naglab-ot sa 426 ang kumpirmado nga kaso sang COVID-19, 99 ang naka recover kag 3 ang patay.
