ILOILO CITY – Mas ginahatagan sang prayoridad ang pagpatigayon sang triage sa pagbaton sang mga pasyente nga nagakinahanglan sang medical attention bilang precautionary measure batok sa Coronavirus Disease 2019 (COVID-19).
Sa pagpaathag sang Oncologist nga si Dr. Anita Jesena, limitado sa subong ang face-to-face consultation apang indi man mahimo nga untaton ang paghatag sang serbisyo sang mga doktor bangud nga madamo nga pasyente ang nagakinahanglan sang bulig.
Sa pagbaton sang pasyente, ginabalanse sang mga medical expert kun sin-o ang dapat nga mangin prayoridad depende kun daw ano ka lala ang balati-an.
Suno kay Dr. Jesena, indi kasubong sang una nga mahimo nga makapakunsulta sa bisan ano nga adlaw ukon oras ang pasyente apang sa subong, kinahanglan anay nga magpa-schedule sang appointment.
Ginpahayag ni Dr. Jesena nga ang ang tanan nga medical staff ang nagasuksok sang Personal Protective Equipment kag may yara man sang plastic barrier nga ginapahamtang sa desk sang doktor agud nga malimitahan ang physical contact sa pasyente.
Ang nasambit nga lihok suno sa natungdan ang pila lamang sa mga lihok agud nga mahatagan sang proteksyon ang tagsa ka pasyente ilabi na ang cancer patients nga regular nga nagapaidalom sa treatment kag ginakabig nga vulnerable ukon madali nga malatnan sang balatian.
