AKLAN – Temporaryo nga ginpaiway sang Department of Education ang Western Visayas Regional Athletics Association Meet bangud sang Novel Coronavirus.
Ini ang ginkumpirma ni Dr. Lea Belleza, Education Program Supervisor kag Information Officer sang Department of Education 6, kasunod sang hingyo sang Division Schools Superintendent ilabi na nga may Persons Under Investigation sa probinsya sang Aklan nga amo ang host sa nasambit nga sports activity.
Sa interview sang Bombo Radyo kay Belleza, iya ginpahayag nga ang nasambit nga lihok ang kabahin sang precautionary measures agud nga indi maglapta ang Novel Coronavirus ilabi na nga madamu sang atleta, coaches, ginikanan kag tumalan-aw ang magasaksi sa nasambit nga hinampang.
Sa pagkamatuod suno kay Belleza, nagsuspinde na sang klase ang apat ka eskwelahan nga malapit sa Gov. Corazon Legaspi-Cabagnot Memorial training Center nga amo ang ginpahamtangan sang quarantine area sang mga pasahero nga nakitaan sang sintomas sang Novel Coronavirus.
Lakip sa mga eskwelahan nga nagpatuman sang class suspension amo ang Regional Science High School, St. Gbariel College, Buswang Old- Bachao Sur Elementary School kag Starglow Center for Academic and Arts.
Nahibalu-an nga ang Western Visayas Regional Athletics Association Meet ang patigayunon kun tani sa Pebrero 15 tubtub 22 apang wala pa mahibalu-an kun san-o patigayunon ang sports activity bangud nga magasapol pa ang tanan nga opisyal sang ahensya agud istoryahan ang final schedule.
