ILOILO CITY- Natalana na nga umpisahan subong nga Disyembre ang pagpatukod sang 31 ka mga eco waiting sheds sa Benigno Aquino Avenue, Mandurriao, Iloilo City.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, ang tukuron nga waiting sheds ang gindesinyo sang Iloilo City Government kag gastuhan naman sang isa ka private corporation.
Suno kay Conlu, dako nga bulig ang waiting sheds agud may pasilungan ang mga tawo nga nagabantay sang salakyan ilabi na sa tion nga mag-ulan.
Dugang pa ni Conlu, makahatag man ini sang dugang nga duag sa Diversion Road nga sentro sang economic activity sa syudad.
