ILOILO – Pasado na sa committee level sang Kamara ang hagna nga nagaduso sa pagpatukod sang Department of Water Resources.
Sa interview sang Bombo Radyo kay Iloilo 3rd District Congressman Lorenz Defensor, iya ginpahayag nga gintipon ang tanan nga hagna sa Kamara may kaangtanan sa pagpatukod sang departamento sa tubig agud nga isa na lamang ka hagna ang iduso kag indi na kinahanglan pa nga debatehan.
Suno kay Defensor, tanan nga water infrastructure ang ikonsidera bilang national interest agud nga mas madasig ang pagpondo sang gobyerno.
Dugang pa sang congressman, magabulig man ang Department of Water and Resources sa pagbantay sang mga pribado ukon pampubliko nga ahensya nga nagapang-abusar ilabi na sa presyo sang tubig.
Ginasiguro naman ni Defensor nga may yara sang mayorya nga nagapabor sa pagpatukod sang Department of Water Resources agud mapasar ini bilang layi.
