Ipaiway sa sulod sang tatlo tubtob anom ka bulan sang Land Transportation Office (LTO) kag Department of Transportation (DOTr) ang pagpatuman sang Republic Act (RA) No. 11229, ukon ang Child Safety in Motor Vehicles Act.
Matandaan nga nasaad sa nasambit nga pagsulundan nga ang mga kabataan nga edad 12 anyos panubo ang nagakadapat nga magpungko sa back seats sang salakyan.
Sa interview sang Bombo Radyo kay LTO Regional Director Eric Tabaldo, iya ginpahayag nga magapatigayon anay ang DOTr sang information dissemination kag pila ka mga preparasyon agud mapahangop ang layi sa publiko.
Suno kay Tabaldo, nagakadapat nga masiguro sang DOTr nga may nagakaigo nga balaklan sang car seat sa diin yara sa sulod sang standard kag de-kalidad nga ginmando sa idalom sang RA 11229 nga may yara sang Philippine Standards mark ukon Import Clearance Certificate.
Matandaan nga ang mandatory nga paggamit sang child restraint systems (CRS), ang para sa mga kabataan edad 12 anyos panubo nga may height nga 4’11” panubo.
Ang CRS ang nagakadapat nga santo man sa edad, height, kag weight sang bata kag ipahamtang sa rear seat sang salakyan.
