ILOILO CITY – Unanimously approved sa Iloilo City Council ang pagpatuman sang curfew hours bilang kabahin sang preventive measures batok sa Coronavirus Disease 2019 (COVID-19).
Sa ginpatigayon nga sesyon, gin-aprobahan ang 8PM-5AM nga curfew hours kun sa diin ang mga madakpan ang iga turn-over sa Barangay Officials apang may yara naman sang exemptions.
Lakip sa exempted amo ang mga nagatrabaho sa nasambit nga curfew hours, ang mga empelyado nga halin sa trabaho kag luyag na nga magpauli, health workers, auhtorized government officials, ang mga may yara sang medical kag humanitarian reasons, mga magapadulong sa airport kag seaport facilities, mga naga-deliver sang pagkaon kag bulong, skeletal workforce sang gobyerno kag public transport services.
Magluwas diri, ginpirmahan naman ni Iloilo City Mayor Jerry Treñas ang Executive Order tuhoy sa temporaryo nga mall hours humalin 11AM-7PM.
Ang nasambit nga mandu ang magapadayon tubtub nga yara sa state of public health emergency ang pungsod bangud sa COVID-19.
Magluwas diri, naaprobahan man sa sesyon ang resolusyon tuhoy sa pagdumili sang bulang sa syudad sang Iloilo, resolusyon nga nagamandu sa tanan nga public utility vehicles nga mag-transport sang indigent nga pasyente nga ginadudahan nga may COVID-19 kag ang ordinansa tuhoy sa pagdumili sa pag-hoard sang supplies.
