ILOILO CITY- Magadala sang dako nga bentaha sa mga commuters ang pagabuksan nga pito ka panibag-o nga mga ruta sa Syudad sang Iloilo may kaangtanan sa ipatuman nga Local Public Transport Route Plan (LPTRP) sa Hunyo 12, 2022.
Sa amo nga mga ruta, lunsay modernized jeepneys ang magabyahe.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office (PSTMO), iya ginpahayag nga wala sang nagalabay nga Public Utility Jeepney (PUJ) sa mga dalan nga sakop sang LPTRP gani mas convenient ini sa mga commuters nga masami pila ka beses nga magsakay antes makalab-ot sa ila destinasyon.
Suno kay Conlu, ini nga mga areas ang ginapanan-aw man nga magsanyog sa sulod sang pila ka tuig bangud nga ginalabayan na ini sang mga modernized jeepneys.
Dugang ni Conlu, obserbahan naman sa sulod sang anom ka bulan kun may kinahanglan nga bag-uhon sa ruta kag kun dugangan sang modernized jeepney units.
Nahibaluan nga masobra sa 15 units sang modernized jeepneys ang magabyahe sa tagsa ka ruta nga ginalakipan sang mga masunod:
- Lapaz to Festive Walk Transport Hub via Nabitasan
- Tagbak to Festive Walk Transport Hub via SM City/Atria
- Tagbak to Lapuz via coastal
- Bitoon to Lapaz via coastal
- Villa to Jaro via Sooc/Oñate Festive Walk Transport Hub
- Ungka to Lapaz via CPU-ISATU
- Mohon to Mandurriao Business District
Samtang, kadungan sang pagpatuman sang LTPRP, tanan nga provincial PUJs ang indi na mahimo makasulod sa Iloilo City.
Ang mahimo lang makasulod sa syudad amo ang mga jeep halin sa Aleosan nga magadiretso na sa Transport Hub sa Megaworld.
Makasulod naman sa syudad ang mg PUJ nga may cargo pass apang indi mahimo nga makapasakay sang pasahero.
