ANTIQUE – Welcome Development para sa Atiqueños ang ginaduso nga One Panay may kaangtanan sa pagpatuman sang Modified General Community Quarantine epektibo Hunyo 1.
Sa interview sang Bombo Radyo kay Gov. Rhodora Cadiao, iya ginpahayag nga isa ka maayo nga balita ang nangin resulta sang pagsinapol sang tanan nga Gobernador sa Western Visayas kaupod si Iloilo City Mayor Jerry Treñas.
Suno kay Cadiao, madamo nga mga Antiqueño nga na stranded sa iban nga lugar ang mahimo na nga makapauli bangud nga dulaon na ang border restrictions apang lauman nga may yara sa gihapon sang checkpoint.
Ginpahayag ni Cadiao nga apisar sini, magapabilin sa gihapon ang health protocol kasubong sang pagsuksok sang face mask, pagsunod sa physical distancing kag ang pag check sang body temperature sa tion nga magbyahe.
Mas makapaayo pa gid suno sa Gobernador nga ipaiway anay ang pagbukas sang klase sa Agosto 24 bangud nga kalabanan sa mga eskwelahan ang ginagamit nga isolation facility.
Tuhoy naman sa ginaduso nga blended teaching bilang alternatibo nga pamaagi, ginpahayag sang natungdan nga indi ini applicable sa Antique bangud nga kalabanan ang wala sang access sa internet kag indi makasarang sa pagbakal sang gadget.
