ILOILO CITY – Mahimo nga abusuhon ang pagpatigayon sang Oplan Kalinga ukon ang house-to-house visitation agud nga madala sa isolation facility ang mga asymptomatic nga COVID-19 patient.
Sa pagpaathag sang legal expert nga si Atty. Joenar Pueblo, makabig nga illegal ang house-to-house visitation bangud nga tanan nga posibilidad ang mahimo matabo ilabi na nga nag-epekto na ang Anti-Terror Law.
Suno kay Atty. Pueblo, ang Oplan Kalinga ukon nagakahulugan nga Operation Care ang dapat nga ipatuman nga may yara sang legal nga basehan agud nga indi mangin kwestyonable ang local contact tracing team nga ginabug-usan sang medical practitioners kag law enforcement agencies.
Ginpahayag ni Atty. Pueblo nga santo sa layi, indi mahimo nga makasulod sa pribado nga propidad kun wala sang warrant of arrest, search warrant ukon court order kag kinamatarong sang tagbalay nga magpamalibad sa pagpasulod sang pangayaw.
Mas makapaayo suno sa natungdan nga magpatigayon anay sang mass testing ang gobyerno agud nga matumod kun sanday sin-o ang positibo sa COVID-19 kag kun matumod na ang mga COVID-19 positive, may yara na sang kinamatarong ang local contact tracing team nga piliton ang pasyente nga magpaidalom sa facility quarantine agud nga mahatagan sang nagakaigo nga medical attention kag agud nga malimitahan ang local transmission sang virus.
Sa pagpatuman sang Oplan Kalinga, ginpahayag sang natungdan nga indi madula ang kakulba bangud nga nabuhinan na ang trust and confidence sang publiko sa law enforcement agencies kasunod sang pagpatuman sang Oplan Tokhang.
