Ginplastar sang chairman sang Committee on Public Safety sang Iloilo City Council nga kinahanglan magpresentar anay ang Philippine National Police sang mabug-at kag bastante nga rason sa ila hingyo nga magpatuman sang signal jamming sa Dinagyang Festival 2025.
Sa interview sang Bombo Radyo kay Councilor Cabaluna, iya ginpahayag kun ginapamilit gid man sang kapulisan, kinahanglan nga may yara gid sang device nga gamiton agud limitahan lang ang mga areas nga madulaan sang signal kag indi na masulit ang natabo sang 2023 nga apektado ang kaiping nga mga banwa kag mangin ang Guimaras.
Suno kay Cabaluna, mas dako ang madul-ong nga disbentaha sang signal jamming kun ikumpara sa bentaha nga mahatag sini.
Pahayag niya, ang maayo nga himuon sang kapulisan amo ang pagpangita sang mga remedyo agud mapabaskog ang paghatag sang seguridad sa publiko nga indi kinahanglan ang pagpatuman sang signal jamming.
Gin-athag naman sang konsehal nga wala pa sang sulat nga nabaton ang konseho tuhoy sa signal jamming nga gina-request sang kapulisan.
