JAPAN – Pormal na nga gindeklarar ni Prime Minister Shinzo Abe ang pagtapos sang state of emergency sa lima ka mga nabilin nga prefectures sa Japan.
Suno kay Bombo International Correspondent Josel Palma, lakip sa mga prefectures nga may pinakamalawig nga state of emergency amo ang Tokyo, Chiba, Kanagawa, Saitama kag Hokkaido.
Ginpahayag ni Palma nga kadungan sang pagpauntat sang state of emergency, ginalauman ang amat-amat nga pag-uswag sang ekonomiya sang Japan kun sa diin ang mga nasambit nga prefectures amo ang may pinakadako nga kontribusyon sa gross domestic product.
Kasunod sang pagtapos sang state of emergency, amat-amat naman nga pagabuksan ang negosyo kasubong sang mall apang istrikto sa gihapon ang pagpatuman sang health protocol.
Kadungan sini, ginpahayag man sang Prime Minister nga prayoridad niya ang paghatag sang cash asisstance sa business sector kag ang pag-host sang Olympics ipaanggid sa pagpasangkad sang inbound tourism.
Ang nasambit nga desisyon sang advisory panel ang kasunod sang pagnubo sang numero sang kumpirmado nga kaso sang Coronavirus Disease 2019 (COVID-19).
Ang Japan ang may 16,628 confirmed COVID-19 cases, 13,612 naman ang naka recover kag 851 ang patay.
