ILOILO CITY – Mahimo nga pasakaan sang kaso nga falsification of public documents ang mga naangot sa pagpeke sang COVID-19 test results.
Sa pagpaathag sang legal expert nga si Atty. Joenar Pueblo, ang COVID-19 test result ang makabig nga public documents bangud may yara ini sang pirma sang government official kasubong sa tiglikom sang Department of Health kag sang chairman sang Philippine Red Cross.
Suno kay Atty. Pueblo, sa tion nga mapamatbatan nga guilty ang private individual ukon public official, may yara ini sang nagakaigo nga imprisonment.
Ginpahayag ni Atty. Pubelo nga bangud madamo ang nadulaan sang trabaho kag tuman ka pigado ang pangabuhi, ang iban ang napilitan na lang nga magpameke sang public documents agud nga makakita sang kwarta apang indi ini makabig nga valid reason.
Ang nasambit nga buluhaton suno sa natungdan ang makatuga sang halit ilabi na kun positibo sa virus ang Locally Stranded Individual ukon repatriated Overseas Filipino Worker apang ginpaguwa nga negatibo ang resulta sang COVID-19 test agud lamang makapauli sa ila lugar.
May kaangtanan naman sa mandu ni Presidente Rodrigo Duterte nga dakpon ang mga wala nagasukok sang face mask sa pampubliko nga lugar, ginpahayag sang natungdan nga makabig ini nga kwestyonable.
Kun basehan ang konstitusyon, mahimo lamang nga arestuhon ang indibidwal kun may yara sang warrant of arrest kag indi bastante nga himuon nga legal basis ang Executive Order sang Presidente.
Sa baylo nga dakpon, mahimo lamang nga sawayon sang otoridad ang mga wala nagasuksok sang face mask sa pampubliko nga lugar.
Nagakinahanglan naman sang mas maathag nga pronouncement may kaangtanan sa ginaduso nga paghimo sa mga chismosa/chismoso nga contact tracers sa COVID-19.
Lakip sa mga rason nga ginplastar ni Atty. Pueblo amo nga indi maathag ang guidelines kun sin-o kag paano makabig nga “gossiper” ang indibidwal kag kun bala masaligan man ang mga impormasyon nga ila ginapakigbahin.
Mas makapaayo suno sa abogado nga ang mga barangay officials ukon ang mga masaligan nga tawo ang pagahimuon nga contact tracers.
