ILOILO CITY – May daku nga epekto sa operation sang Police Regional Office 6 sa tion nga may personnel nga magpositibo sa Coronavirus Disease 2019 (COVID-19).
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga sa bahin sang Western Visayas, 19 na ka PNP personnel ang COVID-19 positive kun sa diin 9 na ang naka-recover samtang 10 pa ang active cases.
Suno kay Malong, duha na ka police station sa Rehiyon 6 ang gin-lockdown nga ginalakipan sang Miagao Municipal Police Station kag Igbaras Municipal Police Station sa probinsya sang Iloilo kasunod sang pagpositibo sa COVID-19 sang pila ka personnel.
Ginpahayag ni Malong nga may protocol nga ginapatuman sa tion nga may personnel nga magpositibo sa COVID-19 agud nga indi tanto nga maapektuhan ang paghatag sang serbisyo sang Philippine National Police.
Nalakip sa protocol amo ang pag-lockdown sa police station para sa disinfection, pag-isolate sa COVID-19 positive kag pagpatigayon sang COVID-19 test sa mga naka-angkon sang close contact.
