Gina-imbestigaran pa ang nagkalain-lain nga anggulo kun paano nakasulod ang mga kontrabando kag kun ngaa nagpositibo sa iligal nga droga ang walo ka Persons Deprived of Liberty (PDLs) sa Iloilo District Jail-Male Dormitory Annex sa Barangay Nanga, Pototan, Iloilo.
Sa interview sang Bombo Radyo kay Atty. Juniven Rey Umadhay, spokesperson sang Bureau of Jail Management and Penology (BJMP) 6, iya ginpahayag nga ginatun-an ang posibilidad nga ginahaboy ang iligal nga droga halin sa gwa kag ginapalapaw sa perimeter wall.
Ginatan-aw man kun indi bala istrikto ang implementasyon sang frisking kag body seach sa mga bisita.
Ang ulihi nga anggulo suno kay Umadhay amo ang possible connivance sang mga personnel.
Bilang kunsekwensya, gin-disqualify nga maka-avail sang Good Conduct Time Allowance (GCTA) ang walo nga nagpositibo sa drug test.
Nahibaluan nga ginpatigayon ang drug test sa surprise joint greyhound operation sang BJMP 6 kag Philippine Drug Enforcement Agency (PDEA) 6 sang Septyembre 14.
Ang greyhound operation amo ang isa sa mga programa nga gin-implementar gilayon sang bag-o nga regional director agud nga malimpyuhan sa kontrabando ang mga jail facility sa Western Visayas.
