ILOILO CITY – Ginalauman ang pagpugok sang trapiko sa karsada malapit sa gina-rehabilitate nga Iloilo Central kag Iloilo Terminal Market.
Ini kadungan sang ginapatuman nga market rehabilitation sang Iloilo City Government sa idalom sang public–private partnership.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga kinahanglan magsakripisyo anay ang mga pumuluyo nga nagaagi sa porsyon sang Mabini, Fuentes, Valeria, Quezon, Guanco, kag Aldeguer streets bangud makitid ang alagyan.
Suno kay Conlu, sa tion nga matapos ang proyekto, indi na ini magtuga sang perwisyo sa mga pumuluyo bangud may ipahamtang nga parking spaces sa mga salakyan.
Sa subong, nakatutok ang opisina sa pag-monitor sang mga market vendors sa dalanon agud indi magsablag sa mga motorista.
Nahibaluan nga may yara sang 1600 ka mga markets vendors sa Iloilo Terminal Market, samtang, 1300 naman ang yara sa Iloilo Central Market.
