CARLES, ILOILO – Wala sang may nakit-an nga nagkalamatay nga isda sa Sitio Luyo, Barangay Poblacion, Carles, Iloilo apisar may porsyon sang baybay nga nagpula.
Sa interview sang Bombo Radyo kay Martin Zambales, pinuno sang mga miyembro sang Bantay Dagat sa amo nga barangay, iya ginpahayag nga padayon ang ila nga monitoring sa mabaho kag pula nga tubig nga nagalapta pa bangud sang huyop sang hangin.
Halin sang nadiskubrehan ini kahapon sang aga, ginabanta tatlo na ka dupa ang kalaparon sang pula nga tubig sa panghigaron sang baybay.
Ginapahayag nga indi ini ang una nga bes nga nagpula ang tubig sa amo nga lugar bangud sang una suno sa iya, may red tide nga natabo sa ila lugar.
Ang kinalain lang suno sa iya, sang una, madamo nga isda ang napatay, samtang wala naman subong sang may nakit-an nga patay.
Pahayag ni Zambales, posible nga sa bahin sang Roxas naghalin ang pula nga tubig. “Sa Roxas, may nagreklamo nga mga pumuluyo nga may mabaho nga halin sa Central suno sa impormasyon. Ang sa akon lang, basi kun halin ini [tubig nga pula] sa Roxas City kag gindala lang di [sa Carles] tungod sa baha.”
Sa subong, nakakuha naman sang water sample ang Philippine Coast Guard kag Bureau of Fisheries and Aquatic Resources. Wala anay subong sang nagapanginhas, nagapangisda, kag nagapaligo malapit sa apektado nga tubig. #
