ILOILO CITY- Ginpatpat sang isa ka Bombo Abogado nga indi mangin mahapos para kay retired Commission on Elections (COMELEC) Commissioner Atty. Rowena Guanzon nga makapungko bilang first nominee sang party-list nga Komunidad ng Pamilya, Pasyente at Persons With Disabilities (P3PWD) sa 19th Congress.
Ini kasunod sang pag-resign sang lima sa nauna nga nominees sang partylist.
Sa interview sang Bombo Radyo kay Atty. Joenar Pueblo, iya ginpahayag nga kinahanglan pa nga mag-agi ini sa deliberasyon sang COMELEC en banc agud madeklarar kun valid ang substitution.
Suno kay Pueblo, apisar madeklarar si Guanzon bilang valid nga first nominee, kun indi man sa gihapon pagtugutan sang House of Representatives nga maka-take oath ini sa Batasang Pambansa, indi gid ini mangin isa ka kongresista.
Matandaan nga yara sa ika- 24 nga pwesto sa May 9 national and local elections ang P3PWD kag nakakuha sang isa ka seat sa House of Representatives.
Una na nga gintalana ang deadline para sa withdrawals kag substitutions sang party-list nominees sang Nobyembre 15.
Sa idalom sang Party-list System Act, ang grupo nga naka-secure sang seats sa kongreso ang mahimo sa gihapon magpasa sang bag-o nga set sang nominees sa tion nga may yara sang bakante.
