ILOILO CITY- Naresolba na sang National Police Commission (NAPOLCOM) ang kontrobersyal nga pagpungko sang bag-o nga hepe sa Buenavista Municipal Police Station sa Guimaras.
Ini kasunod sang pagdangop ni Buenavista Mayor Eugene Reyes sa NAPOLCOM kasunod sang iya pagkwestiyon sa pagpungko ni Pol. Maj. Kenneth Bermejo bilang bag-o nga hepe sang Buenavista PNP apisar wala ini nalakip sa nauna na ginpasa nga rekomendasyon sang Guimaras Police Provincial Office (GPPO) para buslan ang anay hepe nga si Pol. Maj. Anton Von Winkle Lamson.
Sa interview sang Bombo Radyo kay Atty. Joseph Celis, director sang NAPOLCOM Region 6, iya ginpahayag nga valid and effective ang designation ni Bermejo bangud nga Officer in Charge lang ang status sini sa posisyon bilang chief of police sa amo nga police station.
Pahayag niya, mahimo lang nga maka-kwestiyon si Reyes kun mangin permanente na ang designation ni Bermejo pagkatapos sang 30 ka adlaw nga pagpungko bilang OIC.
Gin-athag naman ni Celis nga base sa rules, ang choice sang isa ka alkalde ang recommendatory lang kag yara sa gihapon sa Philippine National Police (PNP) ang appointing authority.
