Ginpanawagan ni Sen. Benigno “Bam” Aquino ang maid-id nga pagrepaso sa paggasto sang Department of Public Works and Highways (DPWH) sa P360 billion nga flood control fund subong nga tuig, sa tunga sang nagapadayon nga problema sa pagbaha sa madamo nga bahin sang pungsod.
Sa gin-file nga resolution, ginhingyo ni Aquino ang mga komitiba sang Senado nga magpatigayon sang imbestigasyon agud mahibaluan kun bala epektibo ang mga proyekto sang DPWH kag kun nagakadto sa husto nga lugar ang mga pondo.
Suno sa senador, humalin 2009 tubtub 2024, naglab-ot na sa P1.47 trillion ang kabug-usan nga flood control budget, apang nagapabilin nga vulnerable sa pagbaha ang madamo nga mga komunidad.
Magluwas sa resolusyon, nagtuhaw man ang mga report nga ginaalegar peke nga flood control projects nga nagapabor sa mga pinili nga kontraktor.
Sa separado nga imbestigasyon sang Senate Blue Ribbon Committee, nakit-an ang halos P100 billion nga balor sang mga proyekto nga posible may mga anomaliya, lakip na ang mga proyekto nga wala nahuman, indi kinahanglan, ukon liwat-liwat.
Ginalauman nga istoryahan sang Senado ang resolusyon sa masunod nga session, bangud sa nagapadayon nga pag-ulan kag pagbaha sa pila ka mga rehiyon sang pungsod.
