YOKOHAMA, JAPAN – Plantsado na ang mga tikang nga patigayunon sang Inter-agency Task Force kadungan sang pag-abot sang mga Pilipino nga crew kag pasahero sang Diamond Princess cruise ship nagikan sa Japan subong nga dominggo.
Suno sa Department of Health, magapaidalom sa kaangay nga procedure nga ginpatigayon sa mga pinoy nga nagikan sa Wuhan city ang ipatuman sa halos 480 ka mga pinoy nga naghingyo sang assistance para sa repatriation.
Sa 44 nga Pilipino nga nag-positibo sa COVID-19 samtang yara sa barko, isa na ang nag-ayo.
Sa subong, gina validate na sang Department of Health ang balita nga nadugangan sang walo ang numero sang mga Pilipino nga nagpositibo sa nasambit nga balatian.
Pagasabton naman sang Magsaysay Maritime Corporation ang pamasahe sang tanan nga repatriates nagikan sa Japan tubtob nga matapos ang ila 14-day quarantine sa New Clark City.
Patigayunon bwas nga adlaw ang send-off activity sa halos 30 ka mga Pilipino nagikan sa Wuhan nga tapos na sa ila quarantine sa New Clark City.
Kaupod nila ang 19 ka mga quarantine officers nga nag-assist sa ila sa sulod sang duha ka semana.
Nahibaluan nga wala sa ila ang nagpositibo sa COVID-19.
