Ginakabig sang pageant coach ni Miss Universe Philippines 2020 Rabiya Mateo nga isa ka daku nga risgo ang ginhimo sang beauty queen sang siya ang nag-resign sa iya trabaho agud pasulabihon ang pagpasakop sa pageant.
Sa interview sang Bombo Radyo kay Weng Diaz, coach sang Ilongga Beauty Queen sa communication skills umpisa sang second year niya sa kolehiyo tubtob sa Marso subong nga tuig, iya ginpahayag nga luyag gid kuntani ni Rabiya nga padayunon ang iya trabaho bilang isa ka physical therapy lecturer.
‘Now or never’ suno kay Diaz ang desisyon ni Rabiya nga magpadayon sa Miss Iloilo 2020.
“It is now or never ang amon nga desisyon kay gusto ya tani magfocus sa obra ya kay teacher na sya. Daw na-hamper ang iya nga career sang ginpili ya ang Miss Iloilo 2020. Actually, may fear ako nga kun wala nagdaug si Rabiya sa national pageant, paano iya irecover liwat ang iya nga career path? Although I know nga indi siya mabudlayan kay maalam siya nga bata… madali na siya makakita sang obra, pero mabalik gid siya sa puno. Pero kay para gid ya sa iya, blessing gid ya. As in. I am so proud of her.”
Suno kay Diaz, una pa lang, nakitaan na sang daku nga potensyal ang 23 anyos nga biracial beauty bangud magluwas nga cum laude ini sa Bachelor of Science degree in Physical Therapy sa Iloilo Doctor’s College, nakahibalo man ini kun paano mamati kag handa man nga tudluan sang iban.
“I am really very happy for her because I see her transition from a very simple girl nga may pinakasimple lang gid nga handum sa kabuhi— nga makatapos sa iya pag-eskwela kag mahatagan sang balay ang iya mama kag utod kag mapaeskwela niya ang iya nga utod, asta nga gin-encourage siya nga mag-join sa Miss Iloilo Doctor’s asta nga ginporma para sa Miss Iloilo 2020 asta nga nagdiretso siya sa national. I am very proud of her kag this is the best for her and Iloilo City as well.”
Suno sa pageant coach, ‘very naive and very quiet’ nga klase sang babayi si Rabiya kag ginatun-an gid sini sang maayo ang iya mga desisyon sa kabuhi.
Ginpahayag ni Diaz nga kabahin sa ila nangin responsibilidad bilang pageant coaches amo ang pagtudlo kay Rabiya sa pagbalanse ang iya mga emosyon kun may magpakanubo sa iya.
Ini ang ginalauman man nga maapply sang Ilongga beauty queen ilabi na bangud may pila ka kontrobersiya ukon negatibo nga komento pagkatapos sang Miss Universe Philippines pageant.
