Gin-postpone ang world super-bantamweight title fight sang Japanese superstar nga si Naoya ‘Monster’ Inoue batok kay American World Boxing Council kag World Boxing Organization champion Stephen Fulton matapos na-injure ang kamot sang Japanese boxer sa training.
Natalana kuntani nga magsabak si Inoue sa iya super-bantamweight debut batok kay Fulton sa Yokohama sa Mayo 7. Apang bangud sa injury, gin-isol ang away sa bulan sang Hulyo.
Nagpangayo man sang pasaylo ang unbeaten Japanese star sa kampo ni Fulton bangud sa problema nga natuga sini.
Nakadaog si Inoue sang world titles sa tatlo ka magkatuhay nga weight divisions, kag sang Disyembre, gintumba sini si Paul Butler sang England kag nangin una nga undisputed bantamweight world champion halin sa nahimo nga rekord ni Enrique Pinder sang Panama sang 1972.
Sang Enero, ginpangbakante ini nga mga titulo matapos nag-desisyon si Inoue nga magsaka sa super-bantamweight division.
Ang 28-anyos naman nga si Fulton ang wala man sang kalutusan sa 21 fights nga may walo ka knock-outs. ##
