ILOILO CITY – Indi lamang para sa mga lalaki ang pagsagod sang manok kag ang pagpakigbahin sa blood sport nga bulang ukon cockfighting.
Ini ang ginpamatud-an sang Psychiatrist nga si Charisse Christine Limoso Lasaleta nga nagpadayon sang legasiya sang iya nagtaliwan nga bana.
Sa Good Morning Philippines program, ginpahayag ni Lasaleta nga nangin kalingawan kag huyog na sang iya bana ang pagsagod sang manok kag ang pagbulang.
Gin-ako ni Lasaleta nga antes pa man napatay ang iya bana sang nakaligad nga tuig, wala siya sang ihibalo sa pagsagod sang manok bangud nga tuman ini ka layo sa iya propesyon.
Bangud sa iya nga emotional attachment, naisipan ni Lasaleta nga padayunon ang pagdumala sa ila manukan bilang handumanan sa iya bana.
Sang una suno sa natungdan, indi niya kabisado ang mga pamaagi sa pagsagod sang manok apang samtang nagadugay, amat-amat niya ini nga natun-an.
Ang pagsagod sang manok suno kay Lasaleta ang kasubong man sa pagsagod sang anak nga nagakinahanglan sang nagakaigo nga pagtatap agud nga indi maka-angkon sang balati-an.
