Posible nga mangin epektibo na masunod nga bulan ang pagsaka sa balayran sa kuryente bangud sang epekto sang gyera sa Middle East kag bangud sa padayon nga pagluya sang balor sang Philippine Peso batok sa US Dollar.
Suno kay Energy Regulatory Commission (ERC) Chairperson Francis Saturnino Juan, maga-reflect ini sa bills sa Abril bilang epekto na sa presyo sang suplay sa generation companies, distribution utilities, kag mga retailer.
Sa subong, wala pa natumod sang komisyon kun pila eksakto ang ipasaka sa power rates.
Una na nga nagpaguwa sang projection ang National Association of Electricity Consumers for Reforms (NASECORE).
Kun ibase sa additional cost suno sa asosasyon, posible nga may dugang sa electricity rate nga P2 tubtub P4, apang i-cover lamang sini ang supply nga ginhatag sang Wholesale Electricity Spot Market (WESM).
Ang dugang nga dos pesos ang katumbas sang P400 nga dugang nga payment para sa mga balay nga may konsumo nga 200 kilowatt hours.
Ginklaro man sang ERC nga naghatag ini sang direktiba sa electric utilities kag generation suppliers nga magpanukot kag magpasaka sang charges sa staggered basis ukon utay-utay ukon pahat-pahat lamang agud indi man matam-an ang mga konsumidor sang kuryente.
