ILOILO CITY – Masobra sa 100 ka mga pasahero ang nagpila kagab-i sa terminal sang depampasahero nga jeep sa Iloilo Terminal Market.
Sa interview sang Bombo Radyo kay Pablito Navales Jr., dispatser, iya ginpahayag nga madugay na nga problema ang pagdinaguso sang pasahero ilabi na sa tion sang rush hour kun hapon.
Suno kay Navales, ang mga pasahero ang yara na sa tunga sang dalan nagabantay agud nga maka-una sakay sa depampasahero nga jeep.
Bangud sini, ginpahayag ni Navales nga ginapapila sang Public Safety and Transportation Management Office ang mga pasahero sa higad sang dalan sa diin first come first serve basis ang ginapatuman.
Ginpahayag ni Navales nga kalabanan sa mga pasahero ang nagasakay sa depampasahero nga jeep nga may ruta Pavia kag Sta. Barbara.
Suno naman kay Jean Lamigo, isa sa mga pasahero, madugay na nga problema ang pagdinaguso sang mga pasahero ilabi na kun kasisidmon.
Ginpahayag ni Lamigo nga mas nag-ayo kag organisado na ang pagsakay sa jeep bangud sa first come first serve basis.
Sa pihak sini, ginpahayag ni Lamigo nga mas makapaayo kun madamu ang jeep nga may ruta nga Pavia kag Sta. Barbara agud nga madasig man ang pagsakay sang mga pasahero.
Samtang, ginpahayag ni Mr. Jeck Conlu, pinuno sang Public Safety and Transportation Management Office, normal lamang nga naglaba ang pila sang mga pasahero bangud nga isa lamang ka linya ang ginapahanugutan.
Kun sang una suno kay Conlu, indi organisado ang pagsakay sang mga pasahero bangud nga kalabanan sa ila ang yara na sa tunga sang dalan nagabantay kag nagasapar nga maka-una sa pagpungko sa jeep.
Kun kaisa suno kay Conlu, indi malikawan nga may yara sang disgrasya nga matabo bangud nga lunsay nagadali sa pagsakay ang mga pasahero apisar nga wala pa nakaplastar ang jeep sa higad sang dalan.
