SINGAPORE – Pagsalig, pagpalangga kag determinasyon ang ginsandigan sang isa ka iloy agud nga magtrabaho sa luwas sang pungsod para sa kaayuhan sang iya pamilya.
Ini ang ginpamatud-an sang Ilongga Overseas Filipino Worker sa Singapore sang si Mercy Saavedra Cacan may kaangtanan sa iya inagyan agud nga mahatagan sang maayo nga kabuhi ang iya tatlo ka kabataan nga nabilin sa poder sang iya bana sa Alimodian, Iloilo.
Sa Good Morning Philippines program, ginpahayag ni Cacan nga indi niya luyag nga maagyan sang iya tatlo ka kabataan ang tuman ka pigado nga kabuhi nga iya naagyan sadto.
Suno kay Cacan, tanan nga pagsakripisyo ang iya ginhimo agud nga makatapos sa pagtuon tubtub nga nahatagan sang kahigayunan nga makatrabaho sa luwas sang pungsod kag sa maayo nga palad, naka-angkon siya sang maayo kag mabuot nga employer.
Ginpahayag ni Cacan nga sa una, nangin mabudlay para sa iya nga mapahilayo sa pamilya apang nagapangibabaw ang iya determinasyon nga magpadayon sa pagtrabaho.
Bangud nga naga-eskwela pa ang mga mga anak sadto, ginahatagan gid niya sang tion ang pagpadala sang sulat kag text message ukon pagtawag sa iya pamilya.
Apisar nga malayo sa iya tatlo ka kabataan, wala siya nagakulang sa paghatag sang giya bilang iloy.
Sa tanan nga kabudlay nga iya naagyan bilang Overseas Filipino Worker, ginpahayag sang natungdan nga indi dapat magdula sang paglaum kag wala ini nangin upang agud nga iya tungdan ang pagka iloy sa iya mga kabataan.
Sa subong, 20 ka tuig na nga nagatrabaho bilang Overseas Filipino Worker si Cacan kag kada duha na lang ka tuig nagapauli apang bangud nga may yara sang krisis, anselado ang iya flight papauli sa Pilipinas subong nga 2020.
