Ginpamatud-an sang isa ka iloy nga wala sang imposible lab-uton nga handom kun nagatinguha para sa pamilya kag Diyos ang sentro sang kabuhi.
Ini amo si Mrs. Rosie G. Juanico sang Bo. Obrero, Lapuz, Iloilo City, isa ka dedikado nga iloy sang apat ka kabataan.
Sa interview sang Bombo Radyo kay Mrs. Juanico, iya ginpahayag nga indi man maisip nga kabudlay ang iya inagihan agud lang nga mahatag ang kinahanglanon sang iya mga anak sa adlaw-adlaw.
Suno kay Juanico, isa sa indi niya malipatan nga kabudlay amo ang pagsaylo-saylo nila sang balay sang 23 ka beses bilang kabaylo sang ila pagpaninguha nga maangkon ang maayo nga pangabuhi.
Pahayag niya, sa pihak sang sini nga pagpanghangkat bangud nga siya mismo ang wala nakatapos sa pagtuon, wala ini nangin upang agud magpakita sang indi malingkang nga determinasyon.
Gintilawan niya ang tanan nga klase sang negosyo kaangay sang pagbaligya sang frozen food kag pagpatindog sang gamay nga karinderya para lang nga mapaeskwela ang iya kabataan.
Ini tanan ang nagbunga bangud nakatapos sa pagtuon ang kabataan, kag madinalag-on sa ila mga karera ang mga ini.
Mensahe sini sa tanan nga iloy subong nga Mother’s Day amo nga indi gid magkalipat sa Diyos sa tanan nga tion kag magpasalamat gid sa Iya.
