ILOILO CITY – Ginahulat na lang ni Iloilo City Mayor Jerry Treñas ang report halin sa Iloilo City Police Office kag Public Safety and Transportation Management Office tuhoy sa assessment sa pagsaulog sang bag-ong tuig sa syudad sang Iloilo.
Sa interview sang Bombo Radyo kay Treñas, iya ginpahayag nga tubtub subong, wala pa siya sang may nabaton nga report tuhoy sa mga nagkalatabo nga insidente kadungan sang New Year’s Eve.
Suno kay Treñas, iya ginakabig nga generally peaceful ang pagsaulog sang bag-ong tuig bangud nga wala sang may natabo nga dalagku nga insidente.
Sa pihak sini, ginpahayag sang alkalde nga indi mahinago nga may minor accidents nga nagkalatabo apang mas manubo ang numero ipaanggid sa mga nakaligad nga tuig.
Ginalakipay man sang natungdan nga ginsunod ang mga ordinansa sa syudad sang Iloilo kasubong na lang sa pagpalupok sang firecrackers sa designated community firecracker zone.
