ILOILO CITY – Mas ginpanami kag enggrande nga pagsaulog sang Dinagyang Festival ang ginaplano sang Iloilo Festivals Foundation Inc.
Sa interview sang Bombo Radyo kay Atty. Jobert Peñaflorida, presidente sang Iloilo Festivals Foundation Inc., iya
ginpahayag nga dako nga pagpanghangkat para sa ila kun paano mas mangin enggrande kag ma-level up ang pagsaulog sang Dinagyang Festival 2020.
Suno kay Peñaflorida, ginatinghuaan nila nga matuman ini agud mahatagan sang mas manami nga Dinagyang experience ang mga Ilonggo ilabi na gid ang mga turista nga magapadulong sa syudad sang Iloilo agud magsaksi sang nasambit nga kahiwatan.
Gin-athag man sang natungdan kun ano ang mangin papel sang Iloilo Festivals Foundation Inc. sa pagpatigayon sang mga nanari-sari festival sa syudad.
Suno kay Peñaflorida, magabuligay ang Iloilo City Government kag Iloilo Festivals Foundation Inc. agud mas mapanami ang pagsaulog sang mga festival umpisa sa masunod nga tuig.
Dugang pa sang natungdan, dako nga bulig sa ila ang dugang nga pondo nga ginhatag sang Iloilo City Government.
Ginlunsyar man sang Iloilo Festivals Foundation Inc. ang 360 Degrees Dinagyang kun sa diin magapasundayag ang mga tribu sa isa ka arena type nga entablado agud mas mahatagan sang kahigayunan ang mga tumalan-aw nga makita sang maayo ang performance sang tagsa ka tribu.
Sa subong suno kay Peñaflorida, ginahulat na lang nga mapirmahan ang Memorandum of Agreement sa tunga sang Iloilo City Government kag sang Iloilo Festivals Foundation Inc.
