ILOILO CITY – Wala sang may natabo nga dalagku nga hitabo sa syudad sang Iloilo kadungan sang pagsaulog sang All Saints Day subong nga adlaw.
Sa interview sang Bombo Radyo kay Iloilo City Police Office Director Police Col. Martin Defensor Jr., iya ginpahayag nga makabig nga ‘generally peaceful’ ang una nga adlaw sang pagsaulog sang tigkalalag.
Suno kay Defensor, ginabanta nga naglab-ot sa 64,000 ang nagpadulong sa mga pampubliko kag pribado nga patyo sa syudad sang Iloilo.
Ginpahayag ni Defensor nga may pipila ka mga tawo ang nakuhaan sang hinganiban apang mas magamay ini ipanggid sa mga nakaligad nga tuig.
Magalawig tubtub sa Nobyembre 3 ang deployment sang Philippine National Police may kaangtanan sa Oplan Ligtas Undas.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga ginabanta nga masobra sa 3,000 ka pulis ang gin-deploy sa mga patyo sa Western Visayas.
Suno kay Malong, humalin sa aga tubtub sa gab-i ang police security sa tagsa ka mga patyo agud nga magbantay sa palibot.
Ginpahayag ni Malong nga kun basehan ang data, tuman ang pagnubo sang numero sang mga nakumpiska nga hinganiban kag iban pa nga mga gamit nga ginadumili-an sa sulod sang patyo.
Mahimo suno kay Malong nga ini ang tuga sang epektibo nga information dessimination tuhoy sa mga pagsulundan nga ginatuman kadungan sang tigkalalag.
