Wala nadayon ang pagsaylo kay anay Bamban, Tarlac mayor Alice Guo sa Pasig City Jail Female Dormitory kagab-i, Septyembre 20.
Suno kay Jail Chief Inspector Jayrex Joseph Bustinera, spokesperson sang Bureau of Jail Management and Penology (BJMP), wala pa nakumpleto sang Philippine National Police (PNP) ang documentary requirements para sa transfer of custody lakip na ang medical assessment.
Ginpahayag man sini kun makaabot na si Guo halin sa PNP Custodial Center sa Camp Crame, ipa-upod ini sa detention facility kun sa diin may yara sang 44 ka mga preso.
Gutok ang sitwasyon bangud ang amo nga area ang maka-akomodar lang kuntani sang siyam ka detainees.
Ang pagsaylo kay Guo ang kasunod sang order sang Pasig City Regional Trial Court Branch 167 nga amo ang may hurisdiksyon sa non-bailable ukon wala-pyansa nga kaso ni Guo nga qualified human trafficking.
Ginpasalig man sang BJMP nga pananglitan mag-abot na ang dismissed mayor, indi ini paghatagan sang special treatment.
Matandaan nga kahapon, nagpyansa si Guo sang P540,000 sa kaso nga graft sa Valenzuela City Regional Trial Court Branch 282.
Kahapon kuntani ang arraignment sa iya sa amo nga kaso, apang na-postpone bangud nag-file ang iya kampo sang motion to quash information.
