ILOILO CITY – Nagsumpa na bilang bag-o nga alkalde sang Iloilo City si Mayor Jose Espinosa III.
Ini matapos ginserbe na sang Department of Interior and Local Government (DILG) ang dismissal order batok kay anay Mayor Jed Patrick Mabilog.
Nagsumpa si Espinosa kay Association of Barangay Captains (ABC) president Reyland Hervias.
Sini nga udto sang ginserbe ang dismissal order sang Ombudsman sa talatapan ni Mabilog sa Iloilo City Hall.
Ginbasa ini ni DILG-6 officer Atty. Cedric Jaranilla kag ginbaton naman ni Atty. Jonar Pueblo nga abogado ni Mabilog.
Kadungan sang iya pagpungko bilang alkalde sang Iloilo City, ginpahayag ni Espinosa nga ipadayon sini ang maayo nga mga programa nga nasuguran ni Mabilog.
Sentruhan man sang administrasyon sini ang peace and order sa siyudad agud masiguro ang padayon nga pagtin-ad sang ekonomiya sang Iloilo City.
Nangin matawhay naman ang pagserbe sang dismissal order apisar nga nangin emosyunal ang mga empleyado sang Iloilo City Hall.
Ginsipa sang Ombudsman sa serbisyo si Mabilog bangud sa “serious dishonesty” bangud sa ginapahayag pagbinutig sini sa iya Statement of Assets, Liabilities and Net Worth (SALN).
