ILOILO CITY – Nangin produktibo ang ginpatigayon nga pagsinapol sang Committee on Transportation sa Sangguniang Panlalawigan, Iloilo City Public Safety and Transportation Management Office (PSTMO) kag Land Transportation Franchising and Regulatory Board (LTFRB)- Region VI angut sa Local Public Transport Route Plan (LPTRP) sang syudad sang Iloilo.
Pila ka mga transport groups sa probinsya sang Iloilo ang nagakahangawa nga indi na sila makasulod sa syudad sang Iloilo kun basehan ang LPTRP sang syudad.
Apang, suno sa PSTMO, mahimo nga makasulod ang mga provincial jeepneys sa syudad apang asta gid lamang sa mga terminal nga yara nahamtang sa syudad sang Iloilo.
Sa interview sang Bombo Radyo kay Board Member Ramon Sullano, chairman sang Committee on Transportation sa Sangguniang Panlalawigan, iya ginpahayag nga maathag na para sa ila ang kaundan sang LPTRP sang syudad.
Dugang pa ni Sullano, apisar nga epektibo na ang ordinansa nga naga adoptar sang LPTRP sang syudad, indi ini sa gilayon ma implementar bangud may yara pa sa gihapon sang mga proseso nga dapat agyan.
Maga-apply pa sa LTFRB ang mga transport groups nga magabyahe sa tagsa ka ruta kag may yara pa sang re-qualification nga matabo.
Mahimo man maka-apply ang mga provincial transport groups sa mga ruta sa syudad.
Pahayag pa dugang sang opisyal, samtang wala pa sang mga unit sang modernized jeepney nga nagabyahe sa mga ruta, mahimo sa gihapon nga makabyahe ang mga provincial jeepneys.
Nagtambong sa pagsinapol ang representante sang PSTMO, LTFRB Region VI kag si Pavia SB Member Pyt Trimañez.
