JORDAN, GUIMARAS – Mabinungahon ang pagpatigayon nga pagsinapol sang Maritime Industry Authority, Philippine Coast Guard kag Motorbanca Cooperative sa Jordan, Guimaras.
Sa interview sang Bombo Radyo kay Philippine Coast Guard-Iloilo Commander Capt. Erlinda Benliro, iya ginpahayag nga indi kinahanglan tanan nga mga motorbanca ang magasunod sa pagbalik sang trapal.
Suno kay Benliro, sa ginpatigayon nga pagsinapol, ila ginpa-intindi sa mga operators ang mga nasaad sa pagsulundan sang Department of Transportation sa pagbalik sang trapal sa mga pumpboats nga may byahe Iloilo-Guimaras vice versa.
Dugang pa sang natungdan, ginadumili-an man ang pagpungko sang pasahero sa likod nga bahin sang makina bangud ini ang delikado.
Nahibaluan nga lakip sa mga pagsulundan sang Department of Transportation amo nga ang kataason ang dapat yara sa 1.8 meters, ang kalabaon ang dapat nga katunga sang pump boat, ang kalapadon ang dapat 80% sang kalapadon sang pump boat kag ang angle sang deflection ang indi dapat maglapaw sa 15 degrees gikan sa horizontal line.
Ang mga pasahero ang nagakadapat nga magsuksok sang life jacket, 75% passenger capacity, sunrise to sunset ang operations sang pagbyahe, may yara sang byahe sa tion sang fair weather condition kag may yara sang radio distress signal ukon communications ang tagsa ka pump boat.
Ang nasambit nga issuance/authority ang nasanto sa phase in/phase out program sang wooden-hulled motorbanca santo sa ginaduso sang kooperatiba ukon boat owners.
Samtang ginkalipay naman sang Jordan Motorbanca Cooperative ang pagpahanugot sang Department of Transportation nga ibalik ang trapal sa mga pumpboats.
Sa interview sang Bombo Radyo kay Ofelia Canja, Presidente sang Jordan Motorbanca Cooperative, iya ginpahayag nga bentaha man sa mga pasahero kag operators nga may tabon na ang pumpboats agud nga indi na mag-agunto ang mga pasahero sa tuman ka init.
Ginpasalamatan man ni Canja ang Maritime Industry Authority kag Philippine Coast Guard nga nagpadulong gid sa Jordan agud nga ipahibalo kag ipa-intindi sa ila ang mga nasambit nga pagsulundan.
Ginalaoman naman nga sa masunod nga semana, may mga trapal na ang mga pumpboats nga magabyahe.
