ILOILO CITY – Dismayado si Iloilo City Councilor Ely Estante matapos nga wala nadayon ang pagsinapol sang Project Monitoring Council kahapon nga adlaw.
Sa interview sang Bombo Radyo kay Estante, chairman sang Project Monitoring Council, iya ginpahayag nga wala nadayon ang pagsinapol bangud nga wala sang quorum.
Suno kay Estante, magluwas sa iya, kabahin sang Project Monitoring Council amo ang mga Association of Barangay Captain President sa tagsa ka distrito sang syudad magluwas lang sa Lapuz nga wala sang may ginpili nga presidente lakip man ang people’s organization.
Ginpahayag ni Estante nga santo sa Executive Order ni Iloilo City Mayor Jerry Treñas, ang pinaka-ulihi nga Biyernes sang tagsa ka bulan, amo ang adlaw sang pagsinapol sang Project Monitoring Council.
Tubtub subong suno sa konsehal, wala pa sang sabat ang mga Punong Barangay tuhoy sa kun nga-a wala sila nakatambong sa pagsinapol sa diin istoryahan kun tani ang tuhoy sa status sang mga proyekto.
