ILOILO CITY – Ginatugyan na sang Department of Health Region 6 sa Crisis Intervention Unit ang pagsolbar sa nanari-sari nga concerns sa tagsa ka hospital.
Ini ang ginpahayag sa Bombo Radyo ni Dr. Marie Jocelyn Te, COVID-19 spokesperson sang Department of Health Region 6 may kaangtanan sa reklamo sang isa ka iloy tuhoy sa sala nga diagnosis sa iya 16 anyos nga anak kag ang pagpatinir sa ila sa ward nga may yara sang COVID-19 positive.
Suno kay Dr. Te, may yara sang komitiba nga in-charge sa pagsolbar sa nanari-sari nga reklamo bangud nga indi na matatapan sang Department of Health Region 6 ang tanan nga hospital sa Western Visayas.
Ginpahayag ni Dr. Te nga ang katungdanan lamang san Department of Health amo ang paghatag sang guidelines kag advisories.
Mahimo lamang nga makapahilabot ang ahensya kun indi na masarangan sang Crisis Intervention Unit ang pagsolbar sang problema.
Matandaan nga sang damlag lang, ginpa-Bombo sang iloy nga residente sang Tigbauan, Iloilo ang tuhoy sa ginapahayag kapabayaan sang Western Visayas Medical Center kun sa diin una nga na-diagnose ang iya anak nga may yara sang acute appendicitis apang sang ulihi, natukiban nga ang pagsakit sang tiyan sang pasyente ang tuga lamang sang dysmenorrhea.
Magluwas diri, ginkwestyon man sang iloy kun nga-a gin-admit ang iya anak sa ward nga gin-lockdown na bangud nga may yara sang pasyente nga nagpositibo sa COVID-19.
