ILOILO CITY – Ginapangitaan sang paagi sang Western Visayas Medical Center Sub-national Laboratory nga masapar ang backlogs kag ang pagpatigayon sang decontamination agud nga indi na atrasado ang pagpaguwa sang COVID-19 test result.
Sa interview sang Bombo Radyo kay Dr. Stephanie Abello, chief pathologist sang Western Visayas Medical Center Sub-national Laboratory, iya ginpahayag nga sa subong, yara pa sa 2,500-3,000 ang backlogs nga dapat tapuson samtang kabahin na sang Standard Operating Procedure ang pagpatigayon sang decontamination sa laboratoryo.
Suno kay Abello, santo sa guidelines, kun indi magnubo sa 10 ang magpositibo sa Coronavirus Disease 2019 (COVID-19) sa tagsa ka batch sang specimen nga ginapaidalom sa test, automatic na ang pagpatigayon sang decontamination.
Ginpahayag ni Abello nga temporaryo nga maga-untat sa pagbaton sang specimen ang Western Visayas Medical Center Sub-national Laboratory sa Hulyo 17, Biyernes tubtob Hulyo 18, Domingo rason nga ang mangin operational lamang amo ang Teresita Lopez Jalandoni Provincial Hospital Molecular Laboratory sa Silay City, Negros Occidental; Corazon Locsin Montelibano Memorial Regional Hospital sa Bacolod City kag Qualimed Hospital sa Iloilo City.
