Pagsolbar sang krimen, illegal gambling kag illegal drugs, pipila lang sa mga luyag tutukan sang bag-o nga ICPO Director

ILOILO CITY – Hugot nga ipatuman ni Iloilo City Police Office Director Pol. Col. Eric Dampal ang mga pagsulundad nga na umpisahan na sa Iloilo City Police Office.

Ginpasiguro sang bag-o nga direktor nga indi lang sa Closed Circuit Television camera ang saligan sang mga kapulisan sa pagpatigayon sang imbestigasyon.

Sa interview sang Bombo Radyo kay Pol. Col. Dampal, iya ginpahayag nga mapadayon ang mga imbestigasyon sa krimen nga nagakatabo sa syudad sang Iloilo apisar nga wala sang Closed Circuit Television camera.

Isa na diri amo ang pagmandu sa iya ni Police Regional Office 6 Director PBGen. Rene Pamuspusan nga tutukan ang kaso nga pagluthang-patay sa negosyante nga si Delfin Britanico sa Barangay Nabitasan, LaPaz, Iloilo City.

Indi naman luyag ni Dampal nga may mga pulis nga wala nagasunod sa internal cleansing program sang Philippine National Police.

Suno sa iya, kinahanglan nga may yara sang dignidad ang mga kapulisan ilabi na sa pagsuksok sang ila uniporme.

Nagakadapat nga mahipid ang uniporme amo man ang buhok sang pulis agud nga indi ini mangin kalain lantawon.

Sa bahin naman sang anti-illegal gambling operation, nagpaandam si Dampal sa may mga namatyan nga kinahanglan isa lang ka lamesa ang ginahiwatan sang pasugal.

Suno kay Dampal, ikonsidera nila kun isa lamang ka lamesa ang sugal kag kun matuod nga may yara sang namatyan.

Kinahanglan pahayag niya nga mahibaluan sang publiko nga kun magsobra sa isa ukon madamo na nga lamesa ang ginapatigayunan sang sugal, makabig na ini nga paglapas sa layi ilabi na kun dako nga kwarta ang ginapusta.

Ginasiguro man sang direktor nga may yara sang anti-illegal gambling operation nga patigayunon sa syudad sang Iloilo.

Indi na problema sa subong sa syudad sang Iloilo kun iligal nga droga ang pagahambalan suno kay Dampal.

Ginakabig sini nga malinong na ang syudad indi kaangay sang una pahayag niya nga may mga dalagko nga personalidad nga naga guwa-pasulod sang droga sa lugar.

Apang sa pagpungko ni Dampal, luyag niya nga siguraduhon nga wala na sang sin-o man nga makapasulod sang iligal nga droga sa syudad sang Iloilo.

Nagpanawagan man si Dampal sa mga kapulisan sa syudad nga indi pagpatiniron ang patrol car sang pulis sa tagsa ka mga police station.

Suno sa ICPO Director, nagakadapat nga ibutang ang patrol car sa mga madamo nga tawo ukon magpatrolya ang mga ini sa syudad.

Naghingyo man si Dampal kay PBGen Pamuspusan sang dugang nga personnel para sa Iloilo City Police Office.