ILOILO CITY – Aprobado na sa Iloiloi City Council ang ginaduso ni Iloilo City Councilor Ely Estante nga pag-amyendar sa Iloilo City Environmental Code.
Ini ang may kaangtanan sa ginaduso nga P3 per kilo nga tipping fee sa paghaboy sang basura sa Calajunan dumpsite sa distrito sang Mandurriao.
Sa interview sang Bombo Radyo kay Estante, iya ginpahayag nga ang paga-amyendaran ang section 33 sang Iloilo City Environmental Code kun sa diin ang pagsukot sang P3 per kilo nga tipping fee ang ginpauntat sadto bangud sa reklamo sang haulers.
Suno kay Estante, antes pa man padayunon ang pagpanukot sang tipping fee, may committee hearing nga ginpatigayon agud nga mahibalu-an ang sentimiyento sang haulers.
Ginpahayag ni Estante nga magluwas sa konsiderasyon nga igahatag sa haulers, ginakinahanglan man sang Iloilo City Government ang kwarta para sa maintenance sang Sanitary Landfill.
Sa subong, ginahulat na lang ang publication sang nasambit nga ordinansa agud nga ini ang mapatuman gilayon.
