ILOILO CITY – Madugay na nga house rules sa Iloilo Fish Port Complex ang pagsuksok sang botas sa mga kliyente nga nagasulod sa compound.
Ini ang gin-athag sang port manager nga si Ramon Barbin kasunod sang reklamo sang mga kliyente bangud nga wala sila gin-abisuhan tuhoy sa istrikto nga pagsulundan antes makasulod sa Iloilo Fish Port Complex.
Sa interview sang Bombo Radyo kay Barbin, iya ginpahayag nga sang Marso 16, may ginpaguwa sila nga abiso tuhoy sa tuman ka istrikto nga pagpatuman sang house rules kasubong sang pagsuksok sang botas, Identification Card kag iban pa nga protective gear kasubong sang facemask.
Suno kay Barbin, indi na bag-o ang nasambit nga pagsulundan bangud nga yara na ini sa existing house rules agud nga mapasigurado ang kalimpyo sa sulod sang compound.
Ginpahayag ni Barbin nga antes pa man ang istrikto ang pagpatuman sang house rules, makapila naman ka bes nga nagpatigayon sang pagsinapol kag may yara sang abiso nga ginpaguwa sang Marso 16.
May ginahatag man nga temporary gate pass kag hugot nga ginapatuman ang social distancing agud nga malimitahan ang paglaton sang virus.
Temporaryo man nga ginpauntat ang pagluto sang pagkaon sa sulod sang compound.
Kadungan sini, gin-athag sang natungdan nga maximum tolerance ang ginahatag apang kun kaisa, indi man malikawan nga may yara sang pagbinaisay nga nagakatabo sa tunga sang guard kag sang kliyente.
