ILOILO CITY – Nagahatag sang pagpangduha-duha ang mando nga naghalin sa National Inter-Agency Task Force kag lokal nga pagsulundan sa mga pumulyo sa syudad sang Iloilo may kaangtanan sa paggamit sang face shield kag face mask.
Ini ang ginpahayag ni Iloilo City Councilor Ely Estante.
Sa interview sang Bombo Radyo kay Estante, iya ginpahayag nga may yara man sang local ordinance nga ginpasar ang syudad sa diin ginapatuman man ang pagsuksok sang face mask, face shield ukon eye protector.
Lakip sa eye protector suno kay Estante, amo ang goggles, eyeglasses, sunglasses, reading glasses kag iban pa agud nga mangin komportable ang mga pumuluyo sa pagsulod sa mga malls, banko kag establisyimento komersyal.
Apang suno kay Estante, santo sa ginpaguwa nga resolution sang National-IATF ginapatuman ang pagsuksok sang full face shield lakip na ang face mask.
Pahayag ni Estante, mahimo nga tunaan ini sang pagbinaisay sang pumuluyo sa publiko kag sa pagsulod sa mga establisyimento komersyal sa diin may pagpangduha-duha sa local kag national nga pagsulundan sa pagsuksok sang sahi sang face shield.
Dugang pa sang natungdan, agud mahatagan sang ka-athagan ang syudad may kaangtanan sa nasambit nga mga pagsulundan, magasapol sa buwas sanday Iloilo City Mayor Jerry Treñas kaupod ang Covid-19 Team sang Iloilo City Government.
Nagpanugyan man si Estante nga hulaton ang desisyon sang Gobyerno kun ano ang sundon nga ordinansa sa syudad sa pagsuksok sang nagakadapat nga face shield.
